ஆம்பியர் எலெக்ட்ரிக் ஸ்கூட்டர்கள்:
இந்தியாவில் தற்போது பிரைமஸ், ஸீல் EX, ரியோ லி ப்ளஸ், மேக்னஸ் மற்றும் புதிதாக அறிமுகப்படுத்திய நெக்சஸ் என ஐந்து மாடல் எலெக்ட்ரிக் ஸ்கூட்டர்களை விற்பனை செய்து வருகிறது ஆம்பியர் நிறுவனம். இவற்றில் நெக்சஸ் மாடலை, நெக்சஸ் ET மற்றும் நெக்சஸ் ST என இரண்டு வேரியன்ட்களாக வெளியிட்டது அந்நிறுவனம். இந்த இரண்டு மாடல்களும் முறையே ரூ.1.09 லட்சம் மற்றும் 1.19 லட்சம் ஆகிய தொடக்க எக்ஸ்-ஷோரூம் விலையில் வெளியிடப்பட்டன.
எலெக்ட்ரிக் ஸ்கூட்டர்கள் விலைக் குறைப்பு:
அந்த வெளியீட்டைத் தொடர்ந்து தற்போது தங்களுடைய ரியோ லி ப்ளஸ் மற்றும் மேக்னஸ் எலெக்ட்ரிக் ஸ்கூட்டர்களின் விலையைக் குறைத்திருக்கிறது ஆம்பியர். ரியோ லி ப்ளஸ் எலெக்ட்ரிக் ஸ்கூட்டரானது முன்னதாக ரூ.69,900 விலையில் விற்பனை செய்யப்பட்டு வந்த நிலையில், தற்போது ரூ.59,900 ஆக ரூ.10,000 வரை விலை குறைக்கப்பட்டிருக்கிறது.
அதன் மற்றொரு எலெக்ட்ரிக் ஸ்கூட்டரான மேக்னஸானது, EX மற்றும் LT என இரண்டு வேரியன்ட்களாக விற்பனை செய்யப்பட்டு வருகிறது. அதில் மேக்னஸ் EX வேரியன்டானது முன்னர் ரூ.1.05 லட்சம் விலையில் விற்பனை செய்யப்பட்டு வந்த நிலையில், தற்போது அது ரூ.95,000 குறைக்கப்பட்டிருக்கிறது. அதேபோல், மேக்னஸ் LT வேரியன்டானது முன்னதாக ரூ.93,900 விலையில் விற்பனை செய்யப்பட்டு வந்த நிலையில், தற்போது ரூ.84,900 ஆகக் குறைக்கப்பட்டிருக்கிறது.
ஆம்பியரின் பிற எலெக்ட்ரிக் ஸ்கூட்டர் விலைகள்:
மேற்கூறிய மாடல்களைத் தவிர்த்து, பிரைமஸ் மற்றும் ஸீல் EX ஆகிய இரண்டு எலெக்ட்ரிக் ஸ்கூட்டர் மாடல்களை அந்நிறுவனம் விற்பனை செய்து வருகிறது. இவற்றில் ஸீல் EX எலெக்ட்ரிக் ஸ்கூட்டரானது, ரூ.87,000 எக்ஸ்-ஷோரூம் விலையிலும், பிரைமஸ் எலெக்ட்ரிக் ஸ்கூட்டாரனது ரூ.1.46 லட்சம் எக்ஸ்-ஷோரூம் விலையிலும் விற்பனை செய்யப்பட்டு வருகிறது. ஆம்பியரின் ஃப்ளாக்ஷிப் மாடலாக விற்பனை செய்யப்பட்டு வருகிறது பிரைமஸ்.
விலை குறைக்கப்பட்ட எலெக்ட்ரிக் ஸ்கூட்டரில் உள்ள வசதிகள்:
தற்போது ரூ.10,000 வரை விலை குறைக்கப்பட்டு ரூ.59,900 விலையில் விற்பனை செய்யப்படவிருக்கும் ரியோ லி ப்ளஸ் எலெக்ட்ரிக் ஸ்கூட்டர் மாடலில் 1.3kWh பேட்டரியைக் கொடுத்திருக்கிறது ஆம்பியர். இந்த பேட்டரியின் உதவியுடன் சிங்கிள் சார்ஜில் 70 கிமீ வரையிலான ரேஞ்சைக் கொண்டிருக்கிறது ரியோ லி ப்ளஸ். ஆனால், இந்த எலெக்ட்ரிக் ஸ்கூட்டரின் அதிகபட்ச வேகம் 25 கிமீ தான். நகரத்திற்குள்ளேயே குறைந்த தூரப் பயன்பாட்டிற்காக இந்த எலெக்ட்ரிக் ஸ்கூட்டரை விற்பனை செய்து வருகிறது ஆம்பியர்.
தற்போது விலை குறைக்கப்பட்ட மற்றொரு எலெக்ட்ரிக் ஸ்கூட்டரானது மேக்னஸில் 38.25AH பேட்டரியைக் கொடுத்திருக்கிறது ஆம்பியர். இந்த பேட்டரியின் உதவியுடன் சிங்கிள் சார்ஜில் 110 கிமீ வரை பயணம் செய்ய முடிகிறது. இந்த எலெக்ட்ரிக் ஸ்கூட்டரானது அதிகபட்சமாக 50கிமீ வேகத்தில் செல்லும் திறனைக் கொண்டிருக்கிறது.
