மஹிந்திரா ஸ்கார்பியோ N மே மாத விலை உயர்வு:
கடந்த ஜனவரி மாதம் ஸ்கார்பியோ N மற்றும் ஸ்கார்பியோ கிளாஸிக் மாடல்களின் விலையை சுமார் ரூ.40,000 வரை உயர்த்தியது மஹிந்திரா. தற்போது அதிகபட்சமாக ஸ்கார்பியோ N மாடலின் சில வேரியன்ட்களின் விலையை ரூ.25,000 வரை உயர்த்தியிருக்கிறது அந்நிறுவனம். அதன்படி, ஸ்கார்பியோ N மாடலின் Z2 மற்றும் Z4 பெட்ரோல் மற்றும் டீசல் வேரியன்ட்கள் மற்றும் Z6 டீசல் வேரியன்ட்களின் விலையை சுமார் ரூ.25,000 வரை உயர்த்தியிருக்கிறது மஹிந்திரா.
இத்துடன், Z8 2 வீல் டிரைவ் பெட்ரோல் மற்றும் டீசல் வேரியன்ட்களின் விலையானது ரூ.10,000 வரை உயர்த்தப்பட்டிருக்கிறது. இந்த விலை உயர்வுடன் ஸ்கார்பியோ N மாடலின் தொடக்க விலையானது ரூ.13.85 லட்சம் எக்ஸ்-ஷோரூமாக அதிகரித்திருக்கிறது. மேலும், அதிகபட்சமாக ரூ.24.54 லட்சம் வரையிலான எக்ஸ்-ஷோரூம் விலையில் விற்பனை செய்யப்பட்டு வருகிறது மஹிந்திரா ஸ்கார்பியோ N.
மஹிந்திரா தார் மே மாத விலை உயர்வு:
தங்களுடைய தார் மாடலின் விலையையும் கடந்த ஜனவரி மாதம் ரூ.35,000 வரை உயர்த்தியிருந்தது மஹிந்திரா. அதனைத் தொடர்ந்து தற்போது மீண்டும் அம்மாடலின் சில வேரியன்ட்களின் விலையை மட்டும் ரூ.10,000 வரை உயர்த்தியிருக்கிறது அந்நிறுவனம். ஹார்டு டாப் கொண்ட தார் வேரியன்ட்களான அடிப்படை LX பெட்ரோல் ஆட்டோமோட்டிக் ரியர் வீல் டிரைவ், AX (O) டீசல் மேனுவல் ரியர் வீல் டிரைவ் மற்றும் LX டீசல் மேனுவல் ரியர் வீல் டிரைவ் ஆகிய வேரியன்ட்களின் விலைகள் தற்போது உயர்த்தப்பட்டிருக்கின்றன. இந்த விலை உயர்வைத் தொடர்ந்து தற்போது ரூ.11.35 லட்சம் தொடக்க விலை முதல் அதிகபட்சமாக ரூ.17.60 வரையிலான எக்ஸ்-ஷோரூம் விலையில் விற்பனை செய்யப்பட்டு வருகிறது மஹிந்திரா தார்.
மஹிந்திரா பொலேரோ நியோ விலை உயர்வு:
இந்தாண்டு பொலேரோ நியோ மாடலின் விலையை முதல் முறையாக உயர்த்தியிருக்கிறது மஹிந்திரா. N4, N8, N10 மற்றும் N10 (O) என நான்கு வேரியன்ட்களாக விற்பனை செய்யப்பட்டு வருகிறது மஹிந்திரா பொலேரோ நியோ. இவற்றில், N4 மற்றும் N8 வேரியன்ட்களின் விலையை மட்டும் முறையே ரூ.5,000 மற்றும் ரூ.14,000 ஆக உயர்த்தியிருக்கிறது அந்நிறுவனம். இந்த விலை உயர்வைத் தொடர்ந்து தற்போது ரூ.9.94 லட்சம் என்ற விலையில் தொடங்கி விற்பனை செய்யப்பட்டு வருகிறது மஹிந்திரா பொலேரோ நியோ.