சிலிண்டர் மானியம்!
இந்தியாவில் இப்போது பெரும்பாலான வீடுகளில் சமையல் சிலிண்டர்கள் பயன்படுத்தப்படுகின்றன. சமையல் சிலிண்டர் பயன்பாட்டை ஊக்குவிக்க அரசு தரப்பிலிருந்து உஜ்வாலா யோஜனா திட்டம் செயபடுத்தப்பட்டு வருகிறது. வீட்டு உபயோகத்துக்கான சமையல் எரிவாயு சிலிண்டருக்கான மானியம் அரசு தரப்பிலிருந்து வாடிக்கையாளர்களுக்கு வழங்கப்பட்டு வருகிறது. இந்த மானியத் தொகை பயனாளிடையே வெவ்வேறாக உள்ளது.
குறைக்கப்பட்ட மானியம்!
கொரோனா பிரச்சினை வந்த பிறகு 2020ஆம் ஆண்டில் சிலிண்டர் மானியம் ரத்து செய்யப்பட்டதாக தகவல் வெளியானது. உண்மையில் சமையல் சிலிண்டர் மானியம் நிறுத்தப்படவில்லை. ஆனால், விலையேற்றம் போன்ற காரணங்களால் கிட்டத்தட்ட மானியம் ரத்துசெய்யப்பட்டது போன்ற சூழலே இருந்தது. பலருக்கு மானியம் வரவில்லை. பலருக்கு மனியத் தொகை மிகவும் தாமதமாக வந்தது.
கணக்கில் வரும் பணம்!
முதலில் நீங்கள் சிலிண்டர் வாங்கும்போது சிலிண்டருக்கான முழு விலையையும் கொடுத்து வாங்க வேண்டும். அதன் பின்னர் அந்த சிலிண்டருக்கான மானியத் தொகை வாடிக்கையாளர்களின் வங்கிக் கணக்கில் அரசு தரப்பிலிருந்து செலுத்தப்படும். சிலிண்டர் மானியத்தை பயனாளியின் வங்கிக் கணக்கிலேயே நேரடியாகச் செலுத்துவதால் கள்ளச் சந்தையில் அரசின் மானிய விலை கேஸ் சிலிண்டர் விற்கப்படுவது போன்ற மோசடிகள் குறைந்துள்ளது.
வருதா இல்லையா?
நாம் வாங்கும் சிலிண்டருக்கான மானியம் மத்திய அரசால் தொடர்ந்து வழங்கப்பட்டு வருகிறது. ஆனால் ஒவ்வொரு முறையும் சிலிண்டரை முன்பதிவு செய்யும்போது அந்த மானியத் தொகை உங்களுக்கு வருகிறதா இல்லையா என்ற சந்தேகம் பலருக்கு உள்ளது. அது தெரியாவிட்டால் கண்டுபிடிக்க மிகவும் எளிமையான வழி உள்ளது. ஆன்லைன் மூலமாகவே அதை நீங்கள் சரிபார்க்கலாம்.
சரிபார்ப்பது எப்படி?
சிலிண்டர் மானியம் குறித்து சரிபார்ப்பதற்கு Mylpg.in என்ற ஆன்லைன் தளத்தில் செல்ல வேண்டும். அந்த வெப்சைட்டின் முகப்பு பக்கத்தில் இண்டேன், பாரத் கேஸ், ஹெச்பி கேஸ் ஆகிய மூன்று சிலிண்டர் நிறுவனங்களின் புகைப்படமும் இருக்கும். அதில் உங்களுக்கு சேவை வழங்கும் நிறுவனத்தை தேர்ந்தெடுக்க வேண்டும். உடனே புதிய பக்கம் ஒன்று திறக்கும். அதிலுள்ள பார் மெனுவுக்குச் சென்று ’Give your feedback online’என்பதைக் கிளிக் செய்ய வேண்டும். மொபைல் நம்பர், கஸ்டமர் ஐடி, விநியோகஸ்தர் பெயர் போன்ற விவரங்களை நிரப்ப வேண்டும். அதன் பிறகு, ‘Feedback Type’ என்பதைக் கிளிக் செய்யவும். பின்னர் ’Complaint’ விருப்பத்தைத் தேர்ந்தெடுத்து ‘Next’ கொடுக்க வேண்டும். உங்கள் வங்கி விவரங்கள் புதிய துணைப்பக்கத்தில் வெளியாகும். மானியத் தொகை வங்கிக் கணக்கில் வந்ததா, இல்லையா என்பதை அதில் நீங்கள் பார்க்கலாம்.
ஆதார் முக்கியம்!
ஆதார் கார்டுடன் இணைக்கப்படாத சிலிண்டர் கணக்குகளுக்கு நேரடியாக மானியம் கிடைக்காது. எனினும், ஆதார் கார்டு இணைக்காதவர்களும் நேரடியாக மானியம் பெற ஒரு வழி இருக்கிறது. உங்களுக்கு அருகில் இருக்கும் சிலிண்டர் ஏஜென்சி கிளைக்கு சென்று உங்கள் வங்கிக் கணக்கு விவரங்களை சமர்ப்பிக்க வேண்டும். வங்கிக் கணக்கு எண், பயனாளியின் பெயர், வங்கியின் IFSC Code, 17 இலக்க சிலிண்டர் வாடிக்கையாளர் ID ஆகியவற்றை சமர்ப்பிக்க வேண்டும். விநியோகஸ்தரிடம் இத்தகவல்களை சமர்ப்பித்துவிட்டால் உங்கள் வங்கிக் கணக்குக்கே நேரடியாக சிலிண்டர் மானியம் வந்துவிடும். உங்களுக்கு எவ்வளவு மானியம் தொகை வருகிறது என்பதை ஏஜென்சியுடன் இணைக்கப்பட்ட மொபைல் எண் தெரிந்துகொள்ளலாம்.
