Battery as a Servie (Baas).. அப்படி என்றால் என்ன?
எலெக்ட்ரிக் வாகனங்களை வாங்குவதில் வாடிக்கையாளர்களுக்கு பல்வேறு தயக்கங்கள் இருந்தாலும், அதில் முக்கியமானது விலை. எலெக்ட்ரிக் கார்களின் பயன்பாட்டுச் செலவு குறைவு என்றால், அதன் தொடக்கவிலை எரிபொருள் கார்களை விட அதிகம்.
இந்தப் பிரச்சினையை சமாளிக்கவே BaaS என்ற இந்த வாடகை முறையில் பேட்டரியை பயன்படுத்திக் கொள்ளும் வசதியை அறிமுகம் செய்திருக்கிறது எம்ஜி மோட்டார்.
இந்த திட்டத்தின் கீழ், காரை மட்டும் நாம் முழுமையாக வாங்கிக் கொண்டு, பேட்டரியை வாடகை முறையில் பயன்படுத்திக் கொள்ளலாம். ஒரு காரில் மிக அதிக விலையுடன் பாகம் பேட்டரி தான். எனவே, இதனை வாடகை முறையில் வழங்குவதன் மூலம் எலெக்ட்ரிக் காரின் தொடக்க விலையை கனிசமாகக் குறைக்க முடியும். இது வாடிக்கையாளர்கள், புதிய எலெக்ட்ரிக் காரை வாங்குவதற்கான நிதிச் சுமையையும் குறைக்கும்.
இல்லை பேட்டரியை வாடகை (BaaS) முறையில் பயன்படுத்த விரும்பவில்லை என்னும் வாடிக்கையாளர்கள் முழுத் தொகையையும் கொடுத்து வழக்கம் போலவும் வாங்கிக் கொள்ளலாம். அது வாடிக்கையாளர்களின் விருப்பம்.
இந்தத் திட்டத்தைத் தேர்ந்தெடுத்தால் எம்ஜி எலெக்ட்ரிக் கார்களின் தொடக்க விலை எவ்வளவு குறையும்?
தற்போது இந்த வாடகை பேட்டரியுடனான காமெட் EV-யை ரூ.4.99 லட்சம் என்ற தொடக்க விலையிலும், ZS EV-யை ரூ.13.99 லட்சம் என்ற தொடக்க விலையிலும் வாங்கிக் கொள்ளலாம் என அறிவித்திருக்கிறது எம்ஜி.
இதன் மூலம் காமெட் EV-யின் தொடக்க விலை ரூ.6.99 லட்சத்தில் இருந்து சுமார் ரூ.2 லட்சம் வரை குறைந்திருக்கிறது. அதேபோல், ZS EV-யின் தொடக்க விலை ரூ.18.98 லட்சத்தில் இருந்து சுமார் ரூ.4.99 லட்சம் வரை குறைந்திருக்கிறது.
இந்த BaaS முறையில், காமெட் EV-யின் பேட்டரியை பயன்படுத்த கிமீ-க்கு ரூ.2.5-ம், ZS EV-யின் பேட்டரியைப் பயன்படுத்த கிமீ-க்கு ரூ.4.5-ம் நாம் வாடகையாக செலுத்த வேண்டியிருக்கும்.
பேட்டரிக்கான வாடகை போக, சார்ஜிங்கிற்கு கட்டணம் செலுத்த வேண்டுமா?
ஆம், நாம் ஒவ்வொரு கிமீ-க்கும் செலுத்தும் தொகை என்பது பேட்டரியைப் பயன்படுத்துவதற்கான வாடகை மட்டுமே. அதற்கு மேல், சார்ஜிங்கிற்கு ஆகும் செலவு என்பது தனி.
மேலும், இந்த BaaS திட்டத்தின் கீழ் ஒவ்வொரு மாதமும் குறைந்தபட்சம் 1,500 கிமீ-களுக்கு நாம் பணம் செலுத்தியாக வேண்டும் என்பதும் குறிப்பிடத்தக்கது. பயன்படுத்தினாலும், பயன்படுத்தவில்லை என்றாலும், 1500 கிமீ-களுக்கான பேட்டரி வாடகையை மாதாமாதம் செலுத்த வேண்டும்.
அந்த வகையில் ஒவ்வொரு மாதமும் காமெட் EV-யின் பேட்டரிக்கு குறைந்தபட்சம் ரூ.3,750-ம், ZS EV-யின் பேட்டரிக்கு ரூ.6,750-ம் நாம் செலுத்த வேண்டியிருக்கும். 1,500 கிமீ-களுக்கு மேல், நாம் எவ்வளவு தூரத்திற்கு அந்த பேட்டரியைப் பயன்படுத்துகிறோமோ, அதற்கான வாடகையை மட்டும் செலுத்தினால் போதும்.
விரைவில் முழுமையான விவரங்கள்:
தற்போது BaaS திட்டத்துடன் கூடிய எலெக்ட்ரிக் கார்களின் தொடக்க விலையை மட்டுமே அறிவித்திருக்கிறது எம்ஜி மோட்டார். வேரியன்ட் வாரியாக, BaaS திட்டத்தின் கீழாக எலெக்ட்ரிக் கார்களின் விலை எவ்வளவு என்பது குறித்தும், BaaS திட்டம் குறித்த முழுமையான தகவல்கள் குறித்து விரைவில் அந்நிறுவனம் அறிவிக்கும் என எதிர்பார்க்கப்படுகிறது.
மேலும், சில வாரங்களுக்கு முன் அந்நிறுவனம் வெளியிட்ட விண்ட்சர் EV-யின் BaaS திட்டத்தின் கீழான விலையை மட்டுமே அறிவித்திருக்கிறது எம்ஜி. பேட்டரியுடன் சேர்த்து அந்தக் காரின் விலையை அந்நிறுவனம் இன்னும் அறிவிக்கவில்லை. அதுவும் விரைவில் அறிவிக்கப்படும் என எதிர்பார்க்கப்படுகிறது.
