வட இந்திய மற்றும் தென்னிந்திய உணவகங்களில் மதிய நேரங்களில் மக்களால் விரும்பி உண்ணப்படும் பலவகை உணவுகளில் “தாலி” எனப்படும் முழு சாப்பாடு முக்கியமான ஒன்று.
இதில் பல ரக காய்கறிகளை கொண்டு விதவிதமாக செய்யப்படும் பதார்த்தங்களும், அளவில்லாத சாதமும் வழங்கப்படுவது வழக்கம்.
இந்நிலையில், கடந்த ஒரு வருட காலகட்டத்தில் “சைவ தாலி” (vegetarian thaali) உணவின் விலை முந்தைய ஆண்டை விட 5 சதவீதம் அதிகரித்துள்ளதாக, நிறுவனங்களுக்கான தரக்குறியீடுகளை வழங்கும் “க்ரிசில்” (CRISIL) மேற்கொண்ட ஆய்வில் தெரிய வந்துள்ளது.
அதே நேரத்தில் “அசைவ தாலி” (nonvegetarian thaali) சாப்பாட்டின் விலை 13 சதவீதம் குறைந்துள்ளது.
“ரோட்டி ரைஸ் ரேட்” (Roti Rice Rate) எனும் பெயரில் சமர்ப்பிக்கப்பட்டுள்ள இந்த அறிக்கைக்காக, பல சைவ மற்றும் அசைவ உணவகங்களில் கடந்த ஓராண்டுகளாக அவர்கள் தொடர்ந்து வழங்கி வரும் மெனுக்களின் அடிப்படையில் ஆய்வு நடத்தப்பட்டுள்ளது.
ஒரு “சைவ தாலி” மெனுவாக, ரோட்டி (Roti), வெங்காயம், தக்காளி, உருளை, அரிசி, பருப்பு (dal), தயிர் மற்றும் பச்சைக்காய்கறி கலவை (salad) உள்ளிட்டவை இந்த ஆய்வில் கணக்கிடப்பட்டது.
ஒரு அசைவ தாலி மெனுவாக, சைவ தாலியில் உள்ளவைகளுடன் பருப்பிற்கு பதிலாக “பிராய்லர்” கோழி உள்ள மெனு கணக்கிடப்பட்டது.
இந்த ஆய்வின்படி, 2023 ஜனவரி மாதம் ரூ.26 என இருந்த ஒரு சைவ தாலி சாப்பாட்டின் விலை, 2024 ஜனவரி மாதம் விலை ரூ.28 என அதிகரித்துள்ளது.
ஆனால், 2023 ஜனவரி மாதம் ரூ.59 என இருந்த ஒரு அசைவ தாலி சாப்பாட்டின் விலை, 2024 ஜனவரி மாதம் ரூ.52 என குறைந்துள்ளது.
தக்காளி, வெங்காயம், அரிசி, பருப்புகள் ஆகியவற்றின் விலையேற்றமே சைவ தாலியின் விலை உயர்வுக்கு முக்கிய காரணம் என ஆய்வு குறிப்பிடுகின்றது.
ஆனால், பிராய்லர் கோழியின் பெருக்கம் காரணமாக அவற்றின் சந்தை விலை 26 சதவீதம் குறைந்து விட்டது. இதனால் அசைவ தாலியின் விலையை உணவக உரிமையாளர்கள் குறைத்தனர்.
இதன் மூலம் உணவு பொருட்களுக்கான விலைவாசி (food inflation) குறையவில்லை என தெரிகிறது என பொருளாதார நிபுணர்கள் கருத்து தெரிவிக்கின்றனர்.